"نتأسف لجماهير الوداد والجماهير المغربية، كنا بغينا نفرحوهم ونحققو نتيجة اللي ترضي الجماهير، خصوصا الجماهير اللي حضرت معنا اليوم، لكن للأسف ما قدرناش، ولكن قدرنا نواجهو فريق كبير اللي هو مانشستر سيتي بالأسلوب ديالو". هذا ما قاله محمد أمين بنهاشم، قبل أن يشير إلى أنه "قبل ما نبداو الماتش كان خاصنا نديرو تحليل، ونشوفو كيفاش غانواجهو هاذ الفريق، ونكونو حتى حنا كاينين في الملعب، وما نكونوش غايبين وشفنا أن نسبة احتكار السيتي للكرة هي الأكبر في العالم وهذا علاش خلينا ليهم الكرة وخدمنا على خلق المساحات للعب".
و أكد بنهاشم أنه طالب لاعبيه بمواجهة خصمهم ندا لند، حيث قال بهذا الخصوص: "قلت للاعبين ما تخافوش، خليوهم ياخدو الكرة، وإيلا خداوها وماركاو علينا أشنو غايوقع كاع، ممكن نخسرو، ولكن نخسرو بالأسلوب ديالنا. المهم حنا ما نكونوش خايفين، ونعطيوهم الكرة بسهولة ونبقاو ندافعو".
وتابع بنهاشم بقوله: "للأسف ما كانش عندنا الوقت الكافي للاستعداد، ولكن مع ذلك خرجنا بالكرة، وخلقنا فرص، وفي الشوط الأول كنا على الأقل نسجلو 2 أهداف، ولكن لسوء الحظ خانتنا شوية الفعالية".
و تحسر مدرب الوداد على خسارة الفريق أمام مانشستر سيتي بسبب هفوات دفاعية. "حنا خدمنا على المساحات ملي تكون الكرة عند السيتي، لأننا عرفنا أنهم كايلعبو على الأطراف بحثا عن النزالات الثنائية، ولكن للأسف تلقينا الهدف الأول بسبب دهشة المباراة الأولى ضد السيتي، وما دخلناش في الماتش، وهنا كايبان الفرق لأنه في المستوى العالي ما كايرحموش"، يوضح بنهاشم، الذي أشار إلى أننا "استقبلنا الهدف الثاني في توقيت صعيب، اللي حنا ضيعنا فيه فرص كان ممكن نسجلوها وترجعنا في المباراة. على العموم أنا ما مرتاحش للنتيجة لأنه حتى واحد ما غايبغي يخسر، ولكن كقتالية وكأداء الحمد لله عندنا علاش نزيدو نخدمو للمباريات المقبلة".
و شدد مدرب الوداد على أنه "كان خاصنا نعرفو الدور ديالنا فهاذ المجموعة، واش غانكونو الفريق اللي باقي الفرق غاتاخد منو النقط، ولا غانكونو فريق اللي غاينافس، واليوم بان لينا أنه بإمكاننا ننافسو، بعدما لعبنا مباراة في المستوى، خصوصا دفاعيا كما أن التحولات من الدفاع للهجوم كانت سريعة".
وتابع بنهاشم قائلا: "كاين أسلوب، وكاينة طريقة ديال اللعب اللي تخدمت وتطبقت، وتايبقى السؤال هو واش غادي نقدرو نطبقوها في المباريات المقبلة؟ هاذي الخدمة ديالي مع الطاقم باش نزيدو نخدمو قبل المباراة الثانية ضد يوفنتوس".
و تحدث بنهاشم بثقة كبيرة عن القادم من المباريات، حيث قال: "درنا ماتش مزيان وخسرنا، وما خاصناش نعاودو نديرو ماتش مزيان ونخسرو، خاصنا نربحو ونتأهلو، ونجيبو نقط. ما يمكنش نبقاو تانديرو ماتش مزيان، ونقولو هذا درس، وهذا درس، لأننا ما جيناش لهنا باش نقراو، جينا باش نشرفو المغرب، ونربحو، ونحققو نتائج وهذا هو اللي غانخدمو عليه".
وأضاف مدرب الوداد: "هاذ الماتش ما خرجناش من المنافسة، وإنما بالعكس دخلنا للمنافسة، غلطنا فيه وخسرنا ولكن خلانا نشوفو أنه بإمكاننا ننافسو، وبإمكاننا نبحثو عن التأهل إلى الدور المقبل إن شاء الله".
و أوضح مدرب الوداد أن "مركب محمد السادس من أحسن المراكز اللي كاينة حاليا في العالم على مستوى تكوين المدربين، وهاذ الشي ما تانقولوش أنا، وإنما تاتقولو نتائج المدربين المغاربة بحال الركراكي والسكيتيوي وعموتة والسلامي والزاكي والطاوسي.. هاذو كلهم مدربين تكونو فمركب محمد السادس لكرة القدم اللي تايخرج حاليا أحسن الأطر في العالم". وأشار بنهاشم إلى أنه "بمجرد ما مدرب مغربي تاتعطاه الفرصة في منافسة عالمية أو قارية تايبرهن أنه من المدربين اللي في المستوى. المدرسة المغربية لتكوين المدربين من أحسن المدارس عالميا، وغاتقول الكلمة ديالها، غير حنا تانحكرو بعضياتنا".