أكد الناخب الوطني وليد الركراكي، بعد الفوز على منتخب تونس، أن المباراة لم تكن سهلة، خصوصا وأن الفريق واجه خصما منظما رغم الغيابات والإرهاق الذي يعاني منه العديد من اللاعبين الممارسين في أندية أوروبية.
وقال الركراكي: “ماشي ساهل باش نواجهو فرقة بحال تونس، كانو عندنا بزاف ديال اللعابة اللي كيلعبو فالدوريات الأوروبية، اللي جاو عندهم مشاكل يا إما بدنية يا إما عضلية، وما قدروش يعطيو اللي عندهم مزيان”.
الناخب الوطني أوضح أنه استغل اللقاء لتجريب عناصر جديدة فالدفاع والهجوم، وقال: “جربنا دفاع جديد، وهجوم جديد، دخلنا الصيباري وبنصغير من باش نشوفو اللعابة الجداد شنو يقدرو يديرو”.
وبخصوص تقييمه للشوط الأول، صرح قائلا: “الشوط الأول ماشي ما عجبنيش، ولكن فيه دروس غنتعلمو منها، خصوصا مع التجربة اللي عند تونس… كانو عندنا بزاف ديال الأخطاء التقنية، خصوصا فالشوط الأول، واللعابا ديالنا اللي جاو جدد خداو شوية الوقت باش ينساجمو”.
وعن اختياراته التكتيكية، قال الركراكي: “النظام 4-3-3 كيعاونا نتحكمو فالبداية، خصوصا وسط الميدان، ولكن ما نقدروش نحكمو فالنتيجة… عندي لاعبين موهوبين، وربما نبدلو النظام نهار الإثنين”.
كما أشار المدرب الوطني إلى أن المنتخب اليوم باتت لديه قاعدة كبيرة من اللاعبين، وهو ما يمنحه حرية في اختياراته: “دخّلت لعابة بحال عبد الصمد، إبراهيم دياز، نصير مزراوي، نايف أكرد، والصحراوي. دابا عندي اختيارات، قبل ما كانش عندي. السنوات الجاية غادي نكونو أحسن”.
وأضاف: “حققنا 11 ربح متتالي، ونهار الإثنين غادي نلعبو باش نديرو رقم قياسي جديد. خاصنا نبقاو فهاد النسق، وخدمنا مزيان اليوم”.
ومن جهة أخرى، عبر الركراكي عن سعادته بالعودة إلى مدينة فاس، وقال: “كلشي عارف المسؤولية، واللي كيلعب عارف قيمتها. وأنا كنقول دايمًا، كل المدن المغربية تستاهل تشوف المنتخب، والماتش ففاس كان مميز، والجمهور كان رائع”.
وبخصوص حالة الملعب، أوضح الركراكي: “أنا اللي طلبت باش يرشو العشب، حيث كان ناشف بزاف، ومع السخونية فالجو، كيأثر على الركبة والعضلات. ولكن اليوم زادوه شوية، وكان ثقيل”.
أما بخصوص المنافسة على مستوى الهجوم، فكان واضحا وصريحا: “المشكل اللي غيكون هو فالمهاجمين، حيت كاينة منافسة قوية، وقلت ليهم: أي واحد خاصو يكون حاضر مع ناديه، ويلعب باش يجي للمنتخب”.
وتكلم على الحصيلة الهجومية فالمباريات الأخيرة، وقال: “من 11 ماتش، كاع المهاجمين سجلو: بنصغير، أوناحي، راحيمي، كعبي. أنا ما كنحبش نعتمد على واحد فقط، بغيت تكون اختيارات”.
وعن يوسف النصيري، قال الركراكي: “يوسف ممكن يبان مزيان فالنظام ديال المنتخب، ولكن خاصو يخدم على راسو حيت كاين المنافسة، واللي كيدخل خاصو يعطي كلشي، باش يدير الضغط على اللي كيبدأ”.
وختم وليد الركراكي تصريحاته برسالة واضحة: “كلشي خاصو يعرف باللي ما كيلعبوش على بلاصتو فقط، كيلعبو على بلاصة فالمنتخب كامل”.
